وانه نايم شفت طيف
شفت وردة بحضن سيف//
وشفت حالوبة جبيرة ماتت أعلة امتون صيف
.
وشفت شمعة
تناغي دمعة
وصوت أسمعة
يصيح طيف
.يصيح طيف
وفززت روحي بديه
وشفت روحي بلايه جسم أعلة الرصيف
.
وكلت طيف..
شفت كونية دفاتر
يمهه دمعة وكلب شاعر
وشفت فاس
بجفه ياس..
وشفت ناس امن انحنت صارت خناجر
وشفت زفه
وناس ترفه
وشفت جف
بجفه دف
وغفلة حسيت الهلاهل
من علت صارت مناجل
.
والفرح ريجه نشف
وكلت طيف
.
أسمعت صوت يصيح موت
أسمعت صرخة بعالي حسهه
طاحت بوادي السكوت
خرسه ما تحجي الحناجر
والحرف يكسر الخاطر
ضل يناطر
بلكي كلمة أعله الشفايف تغلط ومرة تفوت
وماكو صوت
بس خيوط العنكبوت
النسجت من الذل جفن
موتى نمشي بلا دفن
.
شفت جثة بلا ملامح
ومن بعيد اسمع الصايح
ناس تركض مدري وين
هذا راجع
ذاك رايح
ودنكت عالجثة خايف
واسمعت همس الشفايف
ولنه صوتي
ولنهه جثتي
وكلت طيف وما هي جثتي
وما هو صوتي
انه حي
وشلون موتي
وفجأة فزيت اعله صوتي
وثاري طيف
وثاري سيف
وثاري صيف
وراح اضل اعله الرصيف
.!!!!!!!